هنبتدى مع بعض ان شاء الله اول خطوة
لدخول عالم اسماك الزينة للمياه العذبة
وانا بقول المياه العذبة لان فيه تربية اسماك زينة للمياه المالحة وبيبقى لها طقوس تانية تختلف من ناحية الرعاية عن اسماك المياه العذبة
عموما ندخل فى الموضوع
اولا بنشترى حوض السمك وان شاء الله فى مراحل لاحقة نصنعه بنفسنا
وبتكون مقاسات الحوض على حسب الاستخدام والغرض منه
عوامل اختيار مقاسات الحوض
بتتركز فى
عدد الاسماك اللى ناويين نربيها فى الحوض ان شاء الله
مكان الحوض فى الغرفة
نوعية الاسماك
حجم الاسماك
ان شاء الله هانتطرق للنقاط دى فى موضوع شراء الاسماك
لازم يكون مقاس الحوضمتاناسق طول وعرض وارتفاع
عموما
بيكون الارتفاع والعرض تقريبا نصف الطول
50 * 45 * 100
طول * عرض * ارتفاع
ثانيا
بعد شراء الحوض
بنشترى المعدات اللازمة للتربية
فلتر وده انواعه كتير و مهمته تنظيف مياه الحوض من العاوالق وفضلات وبقايا الطعام وبيتحدد على حجم الحوض و النوع الافضل اللى اسمه بور هيد وبيكون قوى
شبكه لنقل الاسماك او وضعها فى الحوض او رفعها منه
الجرش او الحصى وانواعه كتير بس المهم نبعد عن الملون نهائيا لانه بيضر السمك لان الالوان بتذوب فى المياه وتكون مواد كيماوية مضرة
يفضل يكون حجم الجرش اكبر من فم السمكة علشان السمك مايكلوش
نباتات طبيعية او صناعية ويفضل فى البداية الصناعية
العاب وكهوف للاسماك علشان تساعد على اختباءه وبرضه تديله جزء من حياته الطبيعية
مضخة هواء ( موتور هواء علشان التنفس واذابة الاكسجين فى الماء
الاضاءة وتفضل لمبة موفرة للطاقة اللى هيا الدؤرمة او الحلزونى لانها اولا مش بتحتاج غلبة فى التركيب ثانيا مش محتاجه ترنس او غيرة من الحاجات اللى ممكن تكون انه خطر انها توضع داخل حوض السمك
سخان مياه مخصص للسمك ويكون بترموستات علشان يفصل لوحده وده بنحتاجه فى الشتاء طبعا
شفاط لتغييير مياه الحوض
تقريبا كدهدى كل حاجه بحتاجها ان شاء الله للبداية
تجهيز الحوض والحياة
السمك كائن حى وفطرة الكائنات الحية هي النظافة حتى الدود مش بيعيش فى مكان فيه فضلاته
علشان كدا لازم نهتم بنظافة الحوض وادوات السمك وبرضه مش بالطريقة اللى ممكن تكون ضارة
طريقة غسيل الحوض والمعدات بتكون بالماء الدافئ فقط
لا لاستخدام المطهرات من صابون وخلافة
لو حبينا نزود حاجه يبقى الملح ويشطف بعدها جيدا
الجرش لازم نغسله مرارا و تكرارا حتى تكون مياه غسيله مياه رايقة ونظيفه
كذلك السخان والفلتر والنباتات واى حاجه بتوضع فى الحوض يجب غسلها جيدا
بعد الغسيل بنبتدى نرص الحاجه جوه الحوض بعد ما بنحطه فى مكانه لانه طبعا بعد ما نملاه ميه بيستحيل تحريكه
ونتاكد انه راكز فى مكانه علشان تقل المياه ما يكسرهوش
بنضيف المياه من الصنبور ونملا الحوض واحدة واحدة علشان ما نهدش اللى رصناه وكمان مايحصلش شروخ او غيره للحوض
يجب ترك الماء مابين يوم الى اثنين بدون ما نضع السمك فيه ونكون مشغلين الموتور وده علشان الكلور اللى موجود فى المياه يتبخر ومايموتش السمك
انا مش بحب مزيل الكلور لانه من المواد الكيماوية وممكن سوء استخدامه يضر السمك
افضل طريقة اننا نكن المياه يوم او اتنين وانتهت المشكلة
الخطوة الاخيره هيا شراء السمك واضافته فى الحوض ودى باه نعملها موضوع ان شاء الله لوحده
اتنمى من الله انى اكون افدت
اللهم ذكرنى ما نسيت وعلمنا من علمك لا اله الا انت سبحانك انى كنت من الظالمين
شكرا
موضوع: تجهيز بيئة حياة اسماك الزينة فى المنزل ( تجهيز حوض السمك الزجاجى ) 
الجمعة فبراير 29, 2008 4:45 pm
